Reizgers kinne fan april takom jier ôf mei de boat nei Noarwegen. De reis fanút de Eemshaven yn Grinslân duorret mear as fjirtjin oeren en kostet minimaal 225 euro de persoan. Neist toerisme is de "moderne cruiseferry" ek bedoeld foar frachtferkear, sa meldt it bedriuw Holland Norway Lines.

Kommersjeel sjoen sil de ferbining benammen nijsgjirrich wêze út Noarwegen, seit de inisjatyfnimmer by de oankundiging. "Foar de Noarske fakânsjegonger biedt dit nije mooglikheden om Nederlân op in ienfâldige en noflike manier te berikken." De nije ferbining soe ek oanslute by in duorsume wize fan toerisme. De bestimming út Nederlân is Kristiansand yn it suden fan Noarwegen.

De earste kaarten geane dizze wike te keap. It earste farren is op 7 april 2022, wêrnei't de reis trije kear yn 'e wike syld wurdt. Oant no ta is der allinnich mar in oergong fan de Eemshaven nei it Dútske Waadeilân Borkum. Eardere plannen foar in fearboat nei Skotlân kamen ferline jier op neat út.

Lês ek: Populariteit fan auto dielen blykt in kastiel yn 'e loft te wêzen