Taksysjauffeurs kinne har rydgedrach testen litte om skea foar te kommen en taksybedriuwen wer oantreklik te meitsjen foar reguliere fersekerders. De Vereende, in fersekerder dy't benammen as fangnet tsjinnet foar fersekerden dy't troch it hege risiko hast nearne mear hinne moatte, bringt de RijBeterBox yn, in soarte fan swarte doaze dy't rydgegevens byhâldt.

Troch it hege tal ûngemakken mei taksy's binne fersekerders minder gretig wurden om taksybedriuwen te fersekerjen. Ut de skeasifers fan De Vereende docht bliken dat taksy's de ôfrûne fiif jier folle mear skea hawwe as persoaneauto's. It skeabedrach is gemiddeld 50 prosint heger. Wat bydraacht oan faker skea troch taksy's is dat se mear kilometers ôflizze en faker yn stedssintra ride.

Fan 1 febrewaris takom jier ôf kinne taksyklanten fan de Vereende sûnder ekstra kosten harren rydgedrach mjitte mei de doaze. As earste helpt it neffens de fersekerder om bestjoerders ynsjoch te jaan yn har eigen rydgedrach. Dêrneist ropt de Vereende oare fersekerders op om sjauffeurs mei in goede skoare wer as klant oan te nimmen. As dat net kin, biedt de Vereende bestjoerders dy't bewiisd hawwe dat se feilich ride in koarting op de preemje fan oant 30 prosint.

It inisjatyf fan de Vereende wurdt stipe troch Veilig Verkeer Nederland en de transportsektororganisaasje KNV.

Lês ek: Problemen troch personielstekoarten yn de soarchferfiersektor