Njonken in fermindering fan de maksimale snelheid suggerearret it tsienpuntsplan fan de IEA ek faker thús te wurkjen.
As it Ryk beslút om de snelheidslimyt op sneldiken te ferleegjen om oalje te besparjen, soe de mearderheid fan de Nederlanners dat stypje. Sechtich prosint stipet de besparringsmaatregel dy't foarsteld is troch it International Energy Agency (IEA). Dat docht bliken út in ûndersyk fan ANP/LocalFocus yn gearwurking mei Kieskompas.
Fanwege de oarloch yn Oekraïne rôp it IEA ferline moanne oerheden op om ferskate needmaatregels te nimmen oangeande oaljeferbrûk. Bensin en diesel binne beide produkten dy't wûn wurde út rûge oalje. De organisaasje stelt dêrom foar om de maksimumsnelheid mei 10 kilometer yn 'e oere te ferleegjen.
Kieskompas hat dizze besparringsmaatregel tusken 24 en 29 maart presintearre oan in represintative groep fan hast 4000 folwoeksen Nederlanners. Seis op de tsien Nederlanners binne foar in snelheidsreduksje, ien op de trije sit oerdei sels 'wis' efter 90 kilometer yn 'e oere en 120 jûns en moarns iere. Oan de oare kant soe in kertier it bot net iens wêze mei in legere maksimumsnelheid. Noch 15 prosint is it der nei alle gedachten ek net mei iens, mar is yn dy miening minder útsprutsen.
Links en rjochts
Ut it ûndersyk docht ek bliken dat minsken dy't by de lêste Twadde Keamerferkiezings op in linkse partij stimden, faker de snelheidsreduksje stypje as rjochtse kiezers. By de PVV-kiezers is ien op de trije foar dizze besunigingsmaatregel, by de VVD-stimmers de helte en by de kiezers fan bygelyks GroenLinks binne dat njoggen op de tsien. Froulju stypje dizze maatregel ek faker as manlju, en âldere minsken hawwe der minder muoite mei as jongeren.
Neist in fermindering fan de maksimumsnelheid suggerearret it tsienpuntenplan fan de IEA ek faker thús te wurkjen, faker te carpoolen en autofrije sneinen yn grutte stêden yn te fieren.
De Europeeske Uny wurket op it stuit oan plannen om Russyske oalje te boykotten, mar lidsteaten binne it noch net iens.
