It mei de bus of tram fan HTM wurdt takom jier flink djoerder. De ferfierder yn de Haachske regio ferheget de tariven mei 7,24 prosint. 'Wy fine it hiel ferfelend, mar wy hawwe gjin oare kar. Us kosten geane like hurd of noch hurder omheech', seit HTM-direkteur Jaap Bierman. Reizgers betelje op it stuit 0,174 euro de kilometer, dat is nei 1 jannewaris 2023 likernôch 0,187 euro de kilometer. De yntreepriis giet ek omheech.

Net allinnich de Haachske ferfierder HTM bringt de tariven omheech. Regionale ferfierders sille de prizen fan tickets foar tram en bus fan 2023 ôf signifikant ferheegje. Ek Rotterdam steds- en streekferfierbedriuw RET en Connexxion hawwe oankundige dat harren prizen fan 1 jannewaris ôf gemiddeld 7,24 prosint omheech geane. Treinkaartsjes mei de NS wurde nei alle gedachten ek takom jier djoerder. Dat komt troch de koartlyn sletten CAO, wêryn't in strukturele leansferheging fan mear as 9% ôfpraat is. 

yndeksaasje

De transporttariven wurde alle jierren oanpast. De konsumintpriisyndeks, brânstofprizen en arbeidskosten wurde dan yn rekken brocht. Om it iepenbier ferfier oantreklik te hâlden pleitet HTM tegearre mei oare ferfierders in ferleging fan it btw-taryf. No is dat noch 9 prosint, as it oan de HTM-direkteur leit, giet dat op nul. It is de fraach oft it Ryk dêr mei op giet. De ferheging hat net allinnich te krijen mei hegere brânstofprizen, mar ek mei oare ferhege kosten en leanen fan sjauffeurs en meiwurkers binnen de transportbedriuwen. Kompensaasje hjirfoar is gjin taak fan it Ryk.

bern ticket

De kosten fan in bernekaartsje op it iepenbier ferfier yn Den Haach sakje fan 1,50 euro nei 1,00 euro. Dêrmei wol HTM (pake)âlden mei (pake)bern stimulearje om de bus of tram te nimmen op in deitocht. Yn Rotterdam kinne bern oant 12 jier en 65-plussers ek yn 2023 fergees mei it iepenbier ferfier reizgje.